Ang sistema sa halad nga may paghalad og mga mananap ug mga halad sa unod ug ilimnon, nagtudlo sa grasya nga nagahatag og kinabuhi nga gikan kang Hesus pinaagi sa Iyang paghalad sa krus ug sa Iyang pagpanalipod alang kanato didto sa langit.

Ang pangutana, Unsa man ang kahulogan sa tanang timbangan ug sukod sa harina ug lana ug gidaghanon sa mga mananap? Kon kining tanang hitabo nagtudlo lamang sa kamatayon ni Hesus duha ka libo ka tuig ang milabay, ngano man nga lahi-lahi ang gidaghanon sa mga halad nga mananap ug halad sa unod matag relihiyosong panagtigom? Unsa man kini'ng buot ipasabot?

Aduna bay mga leksyon para kanato niining mga halad ug mga gasa nga basin wala nato matagda?

Ang balaod mao ang ebanghelyo nga napadayag sa buhat, ug ang ebanghelyo mao ang balaod nga gilatid ug gipadayag pag-ayo. Ang balaod mao ang gamot, ug ang ebanghelyo mao ang humot nga bulak ug bunga nga nagagikan niini. Ang Daan nga Tugon nagahatag kahayag sa Bag-ong Tugon, ug ang Bag-ong Tugon usab nagahatag kahayag sa Daan. Ang matag-usa kapadayag sa himaya sa Dios diha kang Kristo. Ang duha nagapadayag sa mga kamatuoran nga magapadayon sa pagpadayag sa mas lawom nga kahulugan alang sa matinud-anong magpapanukiduki. Ang kamatuoran diha kang Kristo ug pinaagi kang Kristo walay sukod. Ang magtuon sa Kasulatan sama sa usa ka tawo nga nagatan-aw sa usa ka atabay nga nagalalom ug nagalapad samtang nagatan-aw siya sa ilawom niini. Christ’s Object Lessons 128.

Hinaut nga mas daghan pa ang atong makat-unan bahin sa ebanghelyo pinaagi sa kahayag nga makita sa Daan nga Tugon. Magainom unta kita gikan sa tinubdan ug palalomon ang atong kalipay diha sa ebanghelyo ni Kristo.